عێراق ئامادەیی خۆی پیشاندەداتەوە بۆ گێڕانەوەی ماڵباتە عێراقییەکان لە کامپی هۆل
هەولێر – نۆرس پرێس
حکومەتی عێراق ویستی خۆی بۆ گەڕاندنەوەی هاووڵاتیانی خۆی لە کەمپی هۆل لە رۆژئاوای کوردستان نوێکردەوە، هاوکات دەسەڵاتی ئەمنی بەردەوامە لە وردبینیکردن لە دۆسیەی گەڕاوەکان بە گروپ، کە تا ئێستا 925 خێزان بوون.
سەرلەئێوارەی شەممە، سەرۆکوەزیرانی عێراق، محمد شیاع سودانی، کۆبوونەوەیەکی تایبەتی بە تاوتوێکردنی مەلەفی ئاوارەکانی کەمپی هۆل ئەنجامدا.
لە کۆبوونەوەکەدا وەزیرانی کۆچ و ئاوارە و ناوخۆ و راوێژکاری ئاسایشی نیشتمانی و بەرپرسی دەزگای ئاسایشی نیشتمانی و جێگری نوێنەری ئەمینداری گشتی نەتەوە یەکگرتووەکان لە عێراق و نوێنەرانی رێکخراوی یونیسێف و کۆچی نێودەوڵەتی رێکخراوەکان، و کۆمیساریای باڵای نەتەوە یەکگرتووەکان بۆ پەنابەران، و بەرنامەی گەشەپێدانی نەتەوە یەکگرتووەکان، ئامادەبوون.
لە کۆبوونەوەکەدا جەخت لەسەر “نیشتەجێکردنی عێراقییەکان و مامەڵەی مرۆیی لەگەڵ پرسەکەیان و بەردەوامیی جێبەجێکردنی ئەو بەرنامانەی دیاریکراون بۆ چاکسازی و یەکخستنیان؛ وەک ئامادەکارییەک بۆ گەڕانەوەیان بۆ ناوچە رەسەنەکانیان، و گرتنەبەری رێوشوێنی پێویست بۆ تێپەڕاندنی ئاستەنگەکانی بەردەمی، بەپێی بەیاننامەیەکی حکومەت.
لە میانی دیدارەکەدا، سودانی هەڵسەنگاندنی بۆ دۆسیەی کامپی هۆل کرد، “بە گوێرەی رەهەندە ئەمنی و مرۆییەکان”، وەک خۆی دەڵێت.
لە راگەیەندراوێکدا کە نووسینگەی سودانی بڵاویکردۆتەوە، ئاماژەی بەوەکردووە، لە کۆبوونەوەکەدا باس لە میکانیزمی دابەشکردنی رۆڵەکانی ئەم دۆسیەیە بەسەر لایەنە پەیوەندیدارەکاندا کراوە، هەریەکەیان بەپێی لێهاتوویی خۆیان، بەمەبەستی خێراترکردنی یەکلاکردنەوەیان.