سوپای ئەمریکا و هێزە عێراقییەکان کوژرانی 15 چەکداری داعشیان راگەیاند
هەولێر – نۆرس پرێس
فەرماندەیی ناوەندیی هێزەکانی ئەمریکا “سێنتکۆم” رایگەیاند، لەئۆپەراسیۆنێکى هاوبەشی سوپای ئەمریکا و هێزە ئەمنیەکانی عێراقدا توانیویانە 15 چەکداری داعش لە ئەنبار بکوژن.
سێنتکۆم لە راگەیەندراوێکدا ئاماژەى بەوەکرد، ئەو چەکدارانەی کوژراون چەندین چەک و بۆمب و پشتێنی بۆمبڕێژکراویان پێبووەو.
راشیگەیاند، ئۆپەراسیۆنەکە بەرەبەیانی رۆژی پێنجشەممە ئەنجامدراوە و ئێوارەى رۆژی هەینى راگەیەندراوەو، دەشڵێت ئامانج لە ئۆپراسیۆنەکە بەئامانجگرتنی سەرکردەکانی دەوڵەتی ئیسلامی (داعش) و سنووردارکردنی تواناكانی ئەو رێکخراوە بووە، كە پلانی هێرشیان لەدژی هاوڵاتییانی سڤیل و هاوڵاتییانی ئەمریکی و هاوپەیمانان و هاوبەشەکانیان لە عێراق دادەنا.
بەرپرسێکی وەزارەتی بەرگریی ئەمریکا رایگەیاند، لە کاتی ئۆپەراسیۆنەکەدا پێنج سەربازیان برینداربوون و دووانى دیکەش بەهۆی کەوتنەخوارەوەیان لە کاتی ئۆپەراسیۆنەکەدا برینداربوون، ئاماژەی بەوەشکرد، باری تەندروستی سەرجەمیان جێگیرە.
ئەم ئۆپەراسیۆنە لە کاتێکدایە کە چەند مانگێکە بەغداد و واشنتۆن، سەبارەت بە کەمکردنەوەی ژمارەی هێزەکانی هاوپەیمانان لە عێراق دانوستان دەکەن، بەبێ ئەوەی وادەیەکی فەرمی بۆ کۆتاییهێنان بە ئەرکەکەیان رابگەیەنن.
ئەمریکا نزیکەی 2500 سەرباز لە عێراق و نزیکەی 900 سەربازیش لە رۆژئاوای كوردستان و سووریا هەیە، ئەمەش لە چوارچێوەی ئەو هاوپەیمانییەی کە لە ساڵی 2014 بۆ بەرەنگاربوونەوەی داعش دایمەزراندووە.