“تەحریر شام” لە یەکێک لە کەمپەکانی ئیدلب دەیان كەس دەستگیر دەكات
ئیدلب – نۆرس پرێس
ئەمڕۆ هەینی، دەستەی تەحریر شام (بەرەی نوسرە) ی پێشوو هەڵیکوتایە سەر کەمپی کیللی لە باکووری ئیدلب و 21 کەسیان دەستگیرکرد کە چواریان ژن بوون، بە تۆمەتی هاندان لە دژی تەحریر شام .
بەرپرسێکی پۆلیسی شارۆچکەی کیللی کە بەرپرسە لە کەمپی باکووری ئیدلب، بە نۆرس پرێسی راگەیاند، نیوەڕۆی ئەمڕۆ دەزگای ئەمنی گشتی دەستەی تەحریر شام هەڵیانکوتایە سەر 15 خێمەی ناو کەمپەكە و 21 كەسیان دەستگیركرد، لەنێویاندا چوار ژن هەن، بە تۆمەتی پلاندانان بۆ خۆپیشاندانێک دژی دەستەی تەحریر شام و سەرکردەکەی.
ئاماژەی بەوەشکرد، لە ناوەڕاستی کەمپەکەدا بازگەیەکی ئەمنی دانراوە، جگە لە خاڵێکی دیکەی پشکنین لە دەروازەی رۆژهەڵاتی کەمپی کیللی، بە ئامانجی توندکردنەوەی ئاسایش لەسەر ئەو کەسانەی لەناو کەمپەکەدا نیشتەجێن و تەواوکردنی گەڕان بەدوای داواکراوان.
لە لایەكی دیكەوە پەیامنێری نۆرس پرێس رایگەیاندووە، ئەمڕۆ لە کەمپەکانی ئەتمەی باکووری ئیدلیب، خۆپیشاندان دژ بە دەستەی تەحریر شام بەڕێوەچووە و خۆپیشاندەران داوای ئاشکراکردنی چارەنووسی دەستگیرکراوەکانیان كە لەلایەن دەستەی تەحریر شام دەست بەسەرن.