سه‌رۆكى هه‌رێمى كوردستان پێشوازى له كونسولى نوێى ئه‌مه‌ريكا كرد
هەولێر – نۆرس پرێس
ئەمڕۆ چوارشەممە، نێچيرڤان بارزانى، سه‌رۆكى هه‌رێمى كوردستان پێشوازی لە مارك سترۆ، كونسولى گشتيى نوێى ئه‌مه‌ريكا له هه‌رێمى كوردستان کرد.
سەرۆکایەتی هەرێمی کوردستان لە راگەێنراوێکدا گوتی: “پێشنوه‌ڕۆى ئه‌مڕۆ چوارشه‌ممه 23/8/2023 به‌ڕێز نێچيرڤان بارزانى، سه‌رۆكى هه‌رێمى كوردستان، له ديدارێكدا له‌گه‌ڵ به‌ڕێز مارك سترۆ كونسولى گشتيى نوێى ئه‌مه‌ريكا له هه‌رێمى كوردستان، وێڕاى به‌خێرهێنان، هيواى سه‌ركه‌وتنى بۆ خواست و هه‌موو پشتگيرييه‌كى بۆ سه‌رخستنى ئه‌ركه‌كه‌ى و خواستى هه‌رێمى كوردستانى بۆ بره‌ودانى په‌يوه‌ندييه‌كانى له‌گه‌ڵ ئه‌مه‌ريكا، دووپات كرده‌وه”.
هەروەها لە راگەێنراوەکەدا ئەوەش خراوەتەڕوو، کە “لاى خۆيه‌وه به‌ڕێز كونسولى گشتيى نوێى ئه‌مه‌ريكا وێڕاى ده‌ربڕينى خۆشحاڵى به ده‌ستبه‌كاربوونى له ئه‌ركه‌كه‌يدا، داكۆكى له پابه‌نديى وڵاته‌كه‌ى به بره‌ودان به په‌يوه‌ندييه‌كانى له‌گه‌ڵ هه‌رێمى كوردستان و پته‌وكردنى هاريكاريى هاوبه‌شى نيوانيان كرده‌وه”.
سەرۆکایەتی هەرێمی کوردستان رایگەیاند، کە “دۆخى ناوچه‌كه به‌گشتى و چه‌ند بابه‌تێكى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌كه بوو”.