ئێنریکی: داهاتووی مباپێ دۆسیەیەکی نهێنییە

بەشی وەرزش – نۆرس پرێس

لویس ئێنریکی، راهێنەری نوێی یانەی پاریس سانجێرمان، لەبارەی چارەنووسی “کیلیان مباپێ”ی یاریزانی یانەکەیان و ئەگەری رۆیشتنی لە پاریس هاتەدوو.

ئێنریکی لە کۆنگرەیەکی رۆژنامەوانیدا گوتی: “کاتێک دانوستانمان کرد و گرێبەستەکانم واژۆ کرد، من کراوە بووم بەرامبەر هەموو ئەگەرەکان، چونکە زۆر شت ئەگەری هەیە رووبدات”.

راهێنەرە ئیسپانییەکە ئاماژەی بەوەشکرد، سەبارەت بە چارەنووسی “مباپێ”، دەمەوێت بابەتەکە بە تایبەتی لە نێوان من و بەرپرسانی یانەکەدا بمێنێتەوە، ئەوە نهێنیەکی پیشەگەرانەیە.

لە درێژەی گوتەکانیدا رایگەیاند: “نهێنییەکان ئاشکرا ناکرێن، بەڵام هەوڵدەدەم و زۆر کاردەکەم بۆ ئەوەی باشترین تیم پێکبهێنم”.

گوتیشی: “پشت بە هەموو ئەو یاریزانانە دەبەستم کە گرێبەستی رەوایان هەیە، هەروەها ئەو یاریزانانەی هەوڵدەدەین لەم هاوینەدا گرێبەستیان لەگەڵ بکەین، ماوەی گواستنەوەکە قورس و ئاڵۆزە و گۆڕانکاری زۆری تێدا دەبێت”.

لە کۆتاییدا وتیشی: “گەشبینم بە پێکهێنانی تیمێکی نایاب، وردەکارییەکانی گفتوگۆکەم لەگەڵ سەرۆکی یانەکە و بەڕێوەبەری وەرزشی لە نێوان خۆماندا دەمێنێتەوە”.

یانە پاریسییەکە ئەمڕۆ چوارشەممە گرێبەستەکەی لەگەڵ لویس ئێنریکی راهێنەری ئیسپانی تا هاوینی 2025 راگەیاند.