کۆڵبەرێک بە تەقەی ڕاستەوخۆی هێزەکانی ئێران برینداربوو
هەولێر-نۆرس پرێس
کۆڵبەرێکی خەڵکی شاری بانە بە تەقەی ڕاستەوخۆی هێزەکانی ئێران لە سنوری “هەنگەژاڵ” بەسەختی برینداربوو.
ڕێکخراوی مافی مرۆڤی هەنگاو بڵاویکردەوە، “نیوەڕۆی ئەمڕۆ سێشەممە کۆڵبەرێک بە ناوی شیرکۆ و خەڵکی گوندی حەوتاش-ی شاری بانە، بە تەقەی ڕاستەوخۆی هێزە چەکدارەکانی کۆماری ئیسلامیی ئێران بەسەختی بریندار بوو.
بە وتەی سەرچاوەیەکی ئاگادار، بەهۆی تەقەی ڕاستەوخۆی هێزە چەکدارەکانی حکومەتی ئێران، ڕان و سمتی ئەو کۆڵبەرە بەسەختی برینداربوە و بەمەبەستی چارەسەریی پزیشکی و تیمارکردن بۆ ناوەندە دەرمانییەکانی شاری بانە گواستراوەتەوە.
بە پێی ئامارەکان، لە ماوەی سێ مانگی ئەمساڵدا لانیکەم 44 کۆڵبەر و کاسبکار لە سنورەکانی کوردستانی رۆژهەڵات کوژراون و برینداربونە، کە 34 کەسیان 77% بە تەقەی هێزە چەکدارەکانی کۆماری ئیسلامیی ئێران بونەتە قوربانی.