ئەمساڵ 1300 کەس لە کامپەکانی رۆژئاوای کوردستانەوە گەڕێندراونەتەوە وڵاتەکانیان

هەولێر– نۆرس پرێس

پەیمانگەی واشنتن بۆ لێکۆڵینەوە لە سیاسەتی رۆژهەڵاتی نزیک، پانێڵێکی بۆ تاوتوێکردنی پڕۆسەی گەڕاندنەوەی چەکدارە داعشە دەستگیرکراوەکان و ئەندامانی خێزانیان لە کامپ و زیندانەکانی رۆژئاوای کوردستانەوە، بەڕێوەبرد، تیایدا ‘ئیان مۆس’، جێگری رێکخەری وەزارەتی دەرەوەی ئەمریکا بۆ کاروباری بەرەنگاربوونەوەی تیرۆر رایگەیاند، “ساڵی رابردوو زیاتر لە 3000 ماڵباتی داعش لە کامپەکانی رۆژ و هۆل لە گوندەواری حەسەکەوە گوێزراونەتەوە بۆ وڵاتەکانیان.” واتە زیاتر لە کۆی هەموو ئەوانەی لە دوو ساڵی پێشتر گەڕێندراونەتەوە.

بەرپرسە ئەمریکییەکە روونیدەکاتەوە کە ئەو کەسانە گەڕێندراونەتەوە عێراق، ئەلبانیا، باربادۆس، کەنەدا، فەرەنسا، کۆسۆڤۆ، قیرگزستان، هۆڵەندا، نەرویج، سوودان، ئیسپانیا و سلۆڤاکیا.

ئیان مۆس پێشبینی دەکات، ئەمساڵ 25 وڵاتی جیهان لانیکەم جارێک، ژمارەیەک هاووڵاتییانیان لە کەمپ و گرتووخانەکانی رۆژئاوای کوردستان بگەڕێننەوە.           

مۆس سوپاسی هەموو هاوبەشەکانی ئەمریکای کرد لە بەرامبەر پشتیوانیکردنیان گواستنەوەی ئەو خەڵکە لە کەمپەکان کە لە دۆخێکی ناخۆشدا بوون، بە تایبەتیش کوێت کە بە گوتەی خۆی، بووەتە ترانزێتێکی گرنگ بۆ ئەمریکا لە کاتی گەڕاندنەوەی هاووڵاتییەکانی.

هەروەها دەشڵێت: “سەدان منداڵ ئێستا لە زیان دوورخراونەتەوە و دەتوانن ژیانێکی سەلامەتتر بژین کە شاییستەیانە، دوور لە هەڕەشەی رۆژانەی ئایدۆلۆجیی توندڕەوی داعش.”

مۆس جەختیشیکردەوە کە ئەگەرچی گەڕاندنەوەی ژن و منداڵان گرنگە، پێویستە لەسەر وڵاتان پیاو و گەنجەکانیش لە گرتووخانە و ناوەندەکانی دەستبەسەرکردن بگەڕێننەوە وڵاتەکانیان. 

بەرپرسە ئەمریکییەکە هۆشداریی دەدات لەوەی کە هێشتنەوەی چەکدارەکانی پێشووی داعش لە گرتووخانە و ناوەندەکانی دەستبەسەرکردن لە رۆژئاوای کوردستان، مەترسیی گەورەتری هەیە لە گەڕاندنەوەیان، دەشڵێت، هێشتا 10 هەزار چەکداری بەندکراو لەوێ ماون.

مۆس جەختیشیکردەوە کە چاودێریکردنی خەڵکی نێو کەمپەکان و چەکدارە بەندکراوەکان، بووەتە بارگرانی بەسەر هێزەکانی سووریای دیموکرات (هەسەدەوە)، کە هاوبەشی سەرەکیی ئەمریکایە لە ریشەکێشکردنی داعش.      

بەگوتەی ئەو بەرپرسە ئەمریکییە، “ئاستەنگی سەرەکی لە بەردەم گەڕاندنەوەی خەڵک لە باکووری رۆژهەڵاتی سووریا، ئاستەنگێکی تەکنیکی نییە، بەڵکو سیاسییە،” چونکە سەرکردەی وڵاتانی جیهان دەڵێن “خەڵکی وڵاتەکانیان دژی گەڕاندنەوەی” چەکدارەکانی پێشووی داعش و کەسوکارەکانیانن، “لەبەر ئەوەی پێیانوایە، ئەگەر بە سەرکەوتوویی لێپرسینەوە لە چەکدارەکان بکرێت و بخرێنە زیندانەوە، ئەوا دەکرێت بیری توندڕەوی لە نێو زیندانەکاندا بڵاوبکەنەوە.”

ئیان مۆس هەروەها ئاماژە بەوە دەکات، سەرکردەی ئەو وڵاتانەی کە هاووڵاتییەکانیان لە رۆژئاوای کوردستان ماون، نیگەرانن لەوەی کە ئەو کەسانەی دەگەڕێندرێنەوە و دادگایی ناکرێن، رەنگە “لە ئایندەدا پلانی هێرشی تیرۆریستی دابنێن یان بانگەشە بۆ تووندوتیژی بکەن.”

مۆس دەڵێت، پێویستە وڵاتان هاوسەنگی لە نێوان ئەو نیگەرانیانە و مەترسیی سەرهەڵدانەوەی داعشدا بکەن، دەشڵێت، چارەسەرەکە لە رێگەی “هەنگاوی پێکەوەیی” دەبێت. ئاماژە بەوەش دەکات، “ئەگەر کۆمەڵگەی نێودەوڵەتی پێکەوە کاربکات، دەتوانین ئەو مەترسییە کەمبکەینەوە کە هەموومان رووبەڕووی دەبینەوە.”