حه‌وت هاوڵاتی عێراقی به‌هۆی بومه‌له‌رزه‌كه‌ی توركیاوه گیانیانلەدەستداوە
هەولێر – نۆرس پرێس
به‌رپرسی كاروباری عێراقی له ئه‌نقه‌ره گیانله‌ده‌ستدانی حه‌وت هاوڵاتی عێراقی به‌هۆی بومه‌له‌رزه‌كه‌ی توركیاوه راگه‌یاند و له‌به‌رامبه‌ریشدا محه‌مه‌د شیاع سودانی سه‌رۆك وه‌زیران بڕیاریدا، سه‌رجه‌م پێداویستییه‌كان بۆ ئه‌و هاوڵاتیه عێراقیانه‌ی نیشته‌جێی توركیا و سوریا دابینبكرێت.
باسم عه‌وادی له لێدوانێكی رۆژنامه‌وانیدا رایگه‌یاند، “له پاشخانی بومه‌له‌رزه‌كه‌دا به‌دواداچونی ڕاسته‌وخۆ له‌لایه‌ن سه‌رۆك وه‌زیرانه‌وه هه‌یه به‌مه‌به‌ستی دۆسیه‌ی فریاگوزاری بۆ گه‌لانی سوریا و توركیا، ئه‌ویش له ڕۆژی كاره‌ساته‌كه‌وه ڕێنمایی كردوه، لیژنه‌یه‌كی ته‌كنیكی پێكبهێنن بۆ داڕشتنی پلان و میكانیزمی پێویست بۆ ناردنی هاوكاری بۆ ئه‌و دو وڵاته.
گوتیشی،” محه‌مه‌د شیاع سودانی فه‌رمانیكردوه، به‌دواداچون بۆئه‌و هاوڵاتیه عێراقیانه‌ی نیشته‌جێی سوریا و توركیان بكرێت و پێداویستییه‌كانیان بۆ دابینبكرێت به‌تایبه‌ت بۆئه‌و كه‌سانه‌ی به‌هۆی بومه‌له‌رزه وێرانكه‌ره‌كه‌ی توركیا زیانیان به‌ركه‌وتوه”.
هەر لەوبارەوە، خه‌لیل ئیبراهیم، به‌رپرسی كاروباری عێراقی له ئه‌نقه‌ره رایگه‌یاندوه، به‌هۆی بومه‌له‌رزه‌كه‌ی توركیاوه حه‌وت هاوڵاتی عێراقی گیانیان له‌ده‌ستداوه، هه‌شت هاوڵاتی دیکەش بێسەروشوێنن.
تا ئێستا هیچ زانیاریەک دەربارەی ناسنامەی ئەو هاوڵاتییە عێراقییانە بڵاونەکراوەتەوە کە بە هۆی بومەلەرزەکەی تورکیاوە گیانیانلەدەستداوە، هیچ زانیاریەک نییە کە ئایا هاوڵآتیانی هەرێمی کوردستان لە نێو قوربانیاندا هەن یان نا.