زێو.. نەریتێکی دێرین لە رۆژئاوای کوردستان
قامیشلۆ – نۆرس پرێس
لە وەرزی زستاندا بەپێی نەریتە رەسەنەکانی كوردەواری، کاتێک بۆ ماوەیەکی زۆر باران نەبارێت، خاوه‌ن زه‌وییه‌كان خواردن بۆ منداڵانی ناوچه‌كه دروست ده‌كه‌ن و ده‌یبه‌خشن.
پێیان وایه کاتێک منداڵ بەختەوەر دەبێت خودا بارانێكی به ره‌حمه‌ت ده‌نێرێت، ده‌ڵێن منداڵ بە چاکە و نیعمەت ناسراوە، ئه‌و كه‌لتوره‌ش به‌ناوی زێوی ناو دەبەن.
ئەم کولتوورە كوردییه له كۆنه‌وه تا ئێستا نه‌وه له‌دوای نه‌وه گواستراوه‌ته‌وه و تا ئێستاش له گونده‌كانی رۆژئاوای كوردستان، ئه‌م نەریتە به‌رده‌وامه.
ئه‌و ساڵانه‌ی باران دواده‌كه‌وێت، هەموو ماڵێک ژه‌مێك خواردن بۆ منداڵەکانی گه‌ڕه‌ك ئامادە ده‌كه‌ن تا هەموو منداڵەکان كۆبكه‌نه‌وه و پێكه‌وه نوێژ و نزا بكه‌ن بۆ ئه‌وه‌ی باران ببارێت، چونكه پێیان وایه منداڵ بێتاوانن و نزاكانیان قبوڵ ده‌بێت.
ئه‌م نەریتە خۆشییه‌كه بۆ منداڵان و ده‌بێته‌هۆی ئه‌وه‌ی كه نەریتەکە بۆ نه‌وه‌كانی داهاتووش بگوازرێته‌وه.