سەرۆک وەزیرانی ئیتاڵیا سەردانی عێراق و ھەرێمی کوردستان دەکات
هەولێر – نۆرس پرێس
بڕیارە ئەمڕۆ جۆرجیا میلۆنی سەرۆک وەزیرانی ئیتاڵیا سەردانی عێراق و ھەرێمی کوردستان بکات.
جۆرجیا میلۆنی سەرۆک وەزیرانی ئیتاڵیا لە پەیامێکدا رایگەیاند، ئەمڕۆ لەگەڵ دوو وەزیری حکومەتەکەی سەردانی عێراق و ھەرێمی کوردستان دەکات.
وەک نەریتێکی ساڵانە، لە کریسمسدا سەرۆکوەزیرانی ئیتاڵیا سەردانی سەربازانی وڵاتەکەی دەکات، ئەمساڵ ئەو سەربازانە بەسەردەکاتەوە کە لە عێراق و هەرێمی کوردستان خزمەت دەکەن.
رۆژنامەی “لا ریپەبلیکا”ی ئیتاڵی ئەوەی بڵاوکردەوە، کە جۆرجیا میلۆنی لەسەردانەکەیدا ھێزەکانی وڵاتەکەی، کە لە چوارچێوەی ھاوپەیمانی نێودەوڵەتی دژی داعش لە عێراق و ھەرێمن بەسەردەکاتەوە.
جۆرجیا میلۆنی تەمەنی 45 ساڵە و لە مانگی تشرینی یەکەمی رابردوو وەک یەکەم سەرۆک وەزیرانی ژن لە ئیتاڵیا ھەڵبژێردرا.
ئیتاڵیا لە ساڵی 2014ەوە ئەندامە لە ھاوپەیمانی نێودەوڵەتی دژی داعش و چەندین ھاوکاری و پاڵپشتی پێشکەشی عێراق و ھەرێم کردووە.
بەپێی راپۆرتی ھاوپەیمانی نێودەوڵەتیش، ئیتاڵیا 900 سەرباز و راوێژکاری لە عێراق و ھەرێم ھەیە کە مەشق و راھێنان بە ھێزی پێشمەرگە و سوپای عێراق دەکەن.
ھاوکات ئیتاڵیا ئەندامی دامەزرێنەری یەکێتی ئەوروپایە و سێیەم گەورەترین ئابورییە لە ناوچەی یۆرۆ.