هه‌سه‌ده كوژرانی 12 سه‌ربازی توركیای راگه‌یاند
قامیشلۆ- نۆرس پرێس
رۆژی هه‌ینی، ناوه‌ندی راگه‌یاندنی هێزه‌كانی سوریای دیموكرات “هه‌سه‌ده” كوژرانی 12 سه‌ربازی توركیای راگه‌یاند له‌به‌رامبه‌ر هێرشهكانی توركیا كه له‌سه‌ره‌تای هه‌فته‌ی رابردووه‌وه به‌رده‌وامه.
به گوێره‌ی راگه‌یاندنێكی هه‌سه‌ده، له ماوه‌ی 5 رۆژی رابردوودا، هێزه‌كانیان 4 هه‌وڵی دزه‌كردنی گروپه‌كانی سه‌ر به توركیای پوچه‌ڵكردۆته‌وه.
ئاماژه‌ی به‌وه‌شكرد، له‌و هه‌وڵانه‌دا 8 چه‌كداری ئۆپۆزسیۆن كوژراون، بێ ئه‌وه‌ی هه‌سه‌ده ناوی ئه‌و ناوچانه ئاشكرا بكات كه گروپه‌كانی توركیا هه‌وڵیاندابوو تیادا دزهی بكه‌ن.
هێرشهكانی توركیا بۆ سه‌ر ناوچه‌كانی رۆژئاوای كوردستان پێی ناوه‌ته رۆژی شه‌شه‌م و له ماوه‌ی چه‌ند رۆژی رابردوودا ئه‌و هێرش و بۆردوومانانه بوونه‌ته هۆی گیان له‌ده‌ستدانی هاوڵاتیانی مه‌ده‌نی و شه‌رڤانانی هه‌سه‌ده‌و ژماره‌یه‌ك سه‌ربازی حكومه‌تی سوریاو وێرانكردنی ژێرخانی ناوچه‌كه.