لە بۆردومانێکی تورکیادا بۆ سەر هێزەکانی حکومەت لە باکووری حەسەکە کوژراو و بریندار کەوتەوە
زرگان – نۆرس پرێس
دوای نیوەشەوی رۆژی شەممە، لە بۆردومانێکی هێزەکانی تورکیا بۆ سەر گوندەواری شارۆچکەی زرگان (ئەبو ڕاسین) لە باکووری شاری حەسەکە لە رۆژئاوای کوردستان، سێ ئەندامی هێزەکانی حکومەت کوژران و یەکێكی تر بریندار بوو.
سەرچاوەیەکی سەربازی ئاگادار بە نۆرس پرێسی راگەیاند، دوای نیوەشەوی شەوی رابردوو هێزەکانی تورکیا هێرشێکی ئاسمانی و زەمینییان بۆ سەر گوندەواری شارۆچکەی زرگان دەستپێکردووە و خاڵەکانی حکومەتی سوریایان کردۆتە ئامانج کە لەسەر هێڵە پەیوەندییەکان جێگیرکراون.
بەگوێرەی ئەو سەرچاوەیە، بەهۆی بۆردومانەکەوە سێ ئەندامیان گیانیان لەدەست داوە و کەسێکی دیکەش بریندار بووە.
هێزەکانی رووسیا دەستوەردانیان کرد بۆ رزگارکردنی قوربانییەکان و گواستنەوەیان بۆ نەخۆشخانەکانی ژێر دەسەڵاتی حکومەتی دیمەشق، لەناوچەی چوارچێوەی ئەمنی حەسەکە.
ناوچە جیاکانی رۆژئاوای کوردستان، دوای نیوەشەوی شەوی ڕابردوو، کەوتنە بەر بۆردومانی توندی تورکیا لەلایەن فڕۆکە جەنگییەکان و تۆپخانەکانیانەوە.