ئه‌و پیاوه‌ی 18 ساڵ لە فڕۆکەخانە ژیا گیانی له‌ده‌ستدا
هەولێر – نۆرس پرێس
مێهران کەریمی ناسری، ئه‌و هاوڵاتییه ئێرانییەی ماوه‌ی 18 ساڵ له فڕۆکەخانەی پاریس گیری خوارد و چیرۆكی ژیانی بوه ئیلهامی فیلمێکی هۆڵیود، گیانی لەدەستدا.
به‌پێی تۆڕی هه‌واڵی BBC، مێهران کەریمی ناسری بە “جەڵتەی دڵ” لە تێرمیناڵی 2 ئێف لە فڕۆکەخانەی شارلی دی گۆلی باکوری رۆژهەڵاتی پاریس گیانی لەدەستداوە.
بەرپرسێکی فڕۆکەخانەکە بە ئاژانسی فرانس پرێسی ڕاگەیاندوە، لە کۆتاییدا ناسری مافی ژیانی لە فڕەنسا وەرگرتوە، بەڵام چەند هەفتەیەک لەمەوبەر گەڕایەوە فڕۆکەخانە و لەوێ بە هۆکاری سروشتی گیانی لەدەستداوە.
ئەزمونی مێهران ئیلهامبەخش بوو بۆ فیلمی بەناوبانگی ساڵی 2004 The Terminal کە تۆم هانکس ڕۆڵی سەرەکی تێدا گێڕا.
ناسری لە ساڵی 1945 لە پارێزگای خوزستانی ئێران لەدایکبوە، بۆ یەکەمجار بە دوای دایکیدا گەشتێکی بۆ ئەوروپا کردوە.
ناسری چەند ساڵێک لە بەلجیکا بەسەربرد دوای ئەوەی لە وڵاتانی وەک بریتانیا، هۆڵندا و ئەڵمانیا دەرکرا بەهۆی ئەوەی بەڵگەنامەی کۆچبەری دروستی نەبو، دواتر چو بۆ فڕەنسا، لەوێ تێرمیناڵی 2F بۆ سەرنشینەکان لە فڕۆکەخانە کردە ماڵی خۆی.
پیاوە ئێرانییەکە لەسەر کورسییەکی فڕۆکەخانە دەژیا، بە عەرەبانە دەورە دراوە کە کەلوپەلە کەڵەکەبوەکانی تێدابو، رۆژەکانی بە نوسینی ژیانی خۆی لە دەفتەرەکەیدا و خوێندنەوەی کتێب و ڕۆژنامە بەسەر دەبرد.
چیرۆکەکەی سەرنجی میدیا جیهانییەکانی ڕاکێشا و سەرنجی ئەکتەر و دەرهێنەری ستیڤن سپیلبێرگی ڕاکێشا، کە دەرهێنانی فیلمی The Terminal بو کە هانکس و کاترین زیتا جۆنز ڕۆڵی سەرەکی تێدا دەگێڕن.
دوای نمایشکردنی فیلمەکە، پەیامنێران بە لێشاو ڕویان لە قسەکردن لەگەڵ ئەو پیاوە کرد کە ئیلهامبەخشی فیلمی هۆلیود بو، ڕۆژنامەی لۆ پاریسیان بڵاویکردەوە، لە کاتێکدا ناسری کە خۆی بە “سێر ئەلفڕێد” ناودەبرد، ڕۆژانە شەش چاوپێکەوتنی ئەنجامداوه.
ڕۆژنامەی لیبراسیۆنی فڕەنسی بڵاویکردەوە، سەرەڕای ئەوەی لە ساڵی 1999 پەنابەری و مافی مانەوەی لە فڕەنسا پێدراوە، بەڵام تا ساڵی 2006 لە فڕۆکەخانە ماوەتەوە، دواتر بۆ چارەسەر بردراوەتە نەخۆشخانە، دواتر لە هۆتێلێکدا ژیاوە.
بەرپرسێکی فڕۆکەخانە دەڵێت، ناسری چەند هەفتەیەک لەمەوبەر گەڕاوەتەوە بۆ فڕۆکەخانە و تا مردنی لەوێ ژیاوە.
ئەو بەرپرسە ئاماژەی بەوەشکرد کە چەند هەزار یۆرۆێک لەبەردەستیدا دۆزراوەتەوە.