هێزەکانی سوریای دیموکرات پاشماوەكانی ڕژێمی پێشووی سوریایان لە دێرەزوور دەستگیرکرد
دێرەزوور – نۆرس پرێس
ئەمڕۆ پێنجشەممە، سەرچاوەیەکی سەربازی بە نۆرس پرێسی راگەیاند، هێزەکانی سوریای دیموکرات ئۆپەراسیۆنێکی ئەمنییان لە دژی چەکدارە سەر بە ڕژێمی پێشووی سوریا لە ناوچەکانی دێرەزوور ئەنجامداوە و دەیان کەسیشیان دەستگیرکردووە.
دووشەممەی ڕابردوو، شەڕڤانانی “هەسەدە” خاڵە سەربازییەکان و بارەگاکانی خۆی لە رۆژهەڵاتی دێرەزوور کۆنترۆڵکردەوە، دوای ئەوەی چەکدارەكانی سەر بە رژێمی ئەسەد دەستیان بەسەردا گرتبوو.
ئەو سەرچاوەیە کە سەرکردەیەکی سەربازییە، بە نۆرس پرێس راگەیاندووە، “ئۆپەراسیۆنە ئەمنییەکە ناوچەکانی شحێل و زێبان و سوێدان و جنینە و جیعەی گرتووە”.
راشیگەیاند، ” لە ناوچەکانی جەنابییە و جیعە، “هەسەدە” بە بەشداریی هێزەکانی ئاسایشی رۆژئاوای كوردستان، ١٠ چەکداریان بە تۆمەتی كاركردن لەگەڵ ڕژێمی پێشووی سوریا و هەروەها دەیان چەکدارییشی لە گوندەواری رۆژهەڵاتی دێرەزوور دەستگیركردووە”.
ئەو سەرچاوە سەربازییە ئاماژەی بەوەدا کە “لێکۆڵینەوە لەگەڵ دەستگیرکراوەکان دەکرێت، ئەگەر نەسەلمێنرێت مامەڵەیان لەگەڵ ڕژێمی پێشوودا کردووە، ئەوا ئازاد دەکرێن”.