درۆنێکی تورکیا ئۆتۆمبێلێک لە رۆژئاوای قامشلۆ دەکاتە ئامانج
قامشلۆ – نۆرس پرێس
ئەمڕۆ چوارشەممە، درۆنێکی تورکیا لە سەر رێگای عەلی فرو، لە رۆژئاوای شاری قامشلۆ، ئۆتۆمبێلێکی جۆری (ڤان)ی کردە ئامانج و دەنگۆی بوونی قوربانی و بریندار هەیە.
پەیامنێری نۆرس پرێس رایگەیاند، “درۆنێکی تورکیا ئۆتۆمبێلێکی لەسەر رێگای نێوان شاری قامشلۆ و عامودێ، لە نزیک یەکتربڕی عەلی فرو کردە ئامانج”.
هاوکات شایەتحاڵەکان دەڵێن، “ئامبولانس و ماتۆڕەکانی ئاگرکوژێنەوە چوونەتە شوێنی هێرشەکە، بریندارەکانیش گواستراونەتەوە بۆ نەخۆشخانەکانی شاری قامشلۆ”.
تا کاتی ئامادەکردنی ئەم هەواڵە، هێزەکانی ئاسایشی رۆژئاوای کوردستان هیچ لێدوانێکیان لەسەر ئەو بەئامانجگرتنەکە نەداوە.