تورکیا پێنج ناوچەی لە کۆبانێ و گوندەوارەکەی بۆردوومان کردووە
کۆبانێ – نۆرس پرێس
ئەمڕۆ سێشەممە، چەند شوێنێکی شاری کۆبانی و رۆژئاوای کوردستان بە فڕۆکەی بێفڕۆکەوانی تورکیا بۆردومان کران.
لە ئێوارەی رۆژی شەممەوە، تورکیا دەیان هێرش و بۆردوومانی بۆ سەر شوێن و دامەزراوە گرنگ و خزمەتگوزارییەکان لە شار و ناوچەکانی رۆژئاڤا دەستپێکردووە، بەو هۆیەوە زۆربەی دامودەزگا خزمەتگوزارییەکان لە خزمەت دەرچوون و بە دەیان هاووڵاتی سڤیل گیانیانلەدەستدا و چەندین برینداری لێکەوتووەتەوە.
پەیامنێری نۆرس پرێس لە زاری سەرچاوە خۆجێییەکانەوە رایگەیاندووە، “بۆردومانی تورکیا دارستانی کۆبانێی لە رۆژئاوای شارەکە و زەوییە کشتوکاڵییەکانی رۆژهەڵاتی ئەو شارەی کردووەتە ئامانج”.
ئاماژەی بەوەشکرد، بۆردومانەکەی تورکیا ناوچەیەکی لە باشووری شاری کۆبانێش کردووەتە ئامانج و لە ئەنجامدا ئاگر کەوتووەتەوە.
روونیشیکردەوە، ناوچەیەکی رۆژهەڵاتی گوندی حلنج (4 کم لە باشووری رۆژهەڵاتی شاری کۆبانێ) کراوەتە ئامانج، هەروەها شوێنێکی نزیک بە گوندی دێهابان لە گوندەواری رۆژهەڵاتی شارەکەش بۆردوومان کراوە.