هاوڵاتیانی كورد لە كەركوك خۆپیشاندان و نارەزایەتییان دەربری دژی داخستنی رێگای هەولێر – کەرکوک و گرژی و ئاڵوزی لێکەوتەوە
هەولێر – نۆرس پرێس
ئەمڕۆ شەممە هاوڵاتیانی كورد لە شاری كەركوك خۆپیشاندان و گردبونەوەی ناڕەزایەتیان ئەنجامدا و داوای كردنەوەی رێگای نێوان كەركوك-هەولێریان کردووە كە لەلایەن ژمارەیەك هاوڵاتی عەرەبەوە داخرابوو بەڵام گرژی و ئاڵوزی تێکەوت.
بەپێی زانیاریەکان، هێزەکانی پێشمەرگەی هەرێمی کوردستان بەرەو شارۆچکەی پردێی سەر بە کەرکوک جوڵەی پێکرا، چونکە دۆخی کەرکوک ناجێگیرە.
بەگوێرەی زانیاریەكان، هاوڵاتیانی گەڕەكە کوردنشینەکان خۆپیشاندان و ناڕەزایەتیان ئەنجامداوە و داوادەكەن، رێگای نێوان هەولێر- كەركوك بكرێتەوە كە لەلایەن چەند هاوڵاتیەكی عەرەبەوە لەنزیك گەڕەكی شۆراو ماوەی زیاتر لە هەفتەیەكە داخراوە.
خۆپیشاندەرانی گەرەکە کوردنشینەکان شەقامی سەرەكیان داخست كە نزیكەی دو كیلۆمەتر لە خۆپیشاندەرانی هاوڵاتیە عەرەبەكانەوە دوربوو و ناڕەزایەتی بەرامبەر بەداخستنی ئەو ڕێگا سەرەكیە دەربڕین.
هێزە چەکدارەکانی کەرکوک تەقەیان بەڕووی خۆپێشاندەران کرد و لە ئەنجامدا خۆپێشاندەرێک کوژرا و 14ی دیکەش برینداربوون.
لای خویەوە محەمەد شیاع سودانی فەرماندەی گشتی هێزە چەكدارەكان و سەرۆك وەزیرانی عێراق بڕیاریدا بە سەپاندنی قەدەغەی هاتووچۆ لە تەواوی پارێزگای كەركوك و ئەنجامدانی ئۆپەراسیۆنی ئەمنی بەرفراوان لە شوێنی خۆپیشاندانەكەی ئێوارەی ئەمڕۆی كەركوك بەرێوەچوو.
بەڕێوەبەرایەتی پۆلیسی پارێزگای كەركوك قەدەغەی هاتووچۆی راگەیاند و بڕیاردراوە بە قەدەغەی هاتووچۆ لەسەرتاسەری شەقام و رێگەوبانەكانی كەركوك و هەركەسێكیش پابەندی بڕیارەكە نەبێت لێپرسینەوەی لەگەڵدا دەکرێت.
پۆلیسی پارێزگای كەركوك لەئاگادارینامەیەكدا بۆ هاوڵاتیانی سنوری پارێزگای كەركوك بڵاویكردەوە، هەموو هاوڵاتییان ئاڕاستە دەكەین کە بچنەوە بۆ ماڵەكانیان و شەقامەكانیش چۆڵ بكەن و خۆیان بەدوربگرن لە دروشم و قسەی ناڕاست بۆ تێكدانی دۆخی شارەكە.
هەر بەگوێرەی ئاگادارینامەكە، فەرماندەیی پۆلیس و سەرجەم لایەنە پەیوەندیدارەكان قەدەغەی هاتووچۆ لە سەرتاسەری شاردا جێبەجێ دەكەن، هەر کەسێكیش پابەند نەبێت، لێپرسینەوەی یاسایی لەگەڵ ئەنجامدەدرێت.
ماوەی زیاتر لە هەفتەیەكە ژمارەیەك هاوڵاتی عەرەب رێگای سەرەكی هەولێر- كەركوكیان داخستووە و داوادەكەن، بڕیاری پێدانەوەی بارەگاكان بە پارتی دیموكراتی كوردستان هەڵبوەشێندرێتەوە و رێگە نەدرێت بارەگا و بیناكان بدرێنەوە بەو حزبە.