چوار کەسی ئەندامی خێزانێکی کورد بە مردوویی لە ماڵەکەیان لە ویلایەتی تێکساس دەدۆزرێنەوە
هەولێر- نۆرس پرێس
لە شاری ئاڵێن لە ویلایەتی تێکساسی ئەمریکا، تەرمی خێزانێکی چوار کەسیی کورد لەنێو ماڵەکەیان دەدۆزرێتەوە کە گومان دەکرێت سەرۆکی خێزانەکە هاوژین و منداڵەکانی کوشتبێت و دواتر خۆیشی کوشتبێت.
پۆلیسی شاری ئالێن ئاشکرایکرد، کە ئەو خێزانە کوردە سێ هەفتە بەر لە ئێستا کچێکی چوار ساڵیان لە مەلەوانگەیەک خنکاوە، باوەڕیان وایە کە ئەوە هۆکارێکی ئەو رووداوە بێت.
خێزانە چوارکەسییەکە پێکهاتوون لە فەرمان شێروانی، باوک؛ لەیلا شێروانی، دایک؛ مەتین شێروانیی تەمەن دوو ساڵ و شاهین شێروانیی تەمەن 12 ساڵ.
شاری ئاڵێن بە دووریی نزیکەی 50 کیلۆمەتر دەکەوێتە باکووری شاری داڵاسەوە. پۆلیسی شارەکە ئاشکرایکرد، ئەندامێکی خێزانەکە کاتێک گەڕاوەتەوە ماڵەوە بینیویەتی هەموو دەرگەکان داخراون و نەیتوانیوە بیانکاتەوە، بۆیە پەیوەندی بە پۆلیسەوە کردووە. پۆلیسیش دوای دوو کاتژمێر توانیویەتی بچێتە نێو ماڵەکەوە.