لە دهۆک باندێکی گەورەی مادەی هۆشبەر دەستگیرکران

هەولێر-نۆرس پرێس

هێزێکی عێراقی بە هاوکاری ئاسایشی دهۆک باندێکی گەورە بە سەدان کیلۆگرام مادەی هۆشبەرەوە دەستگیرکران.

ئەنجومەنی باڵای دادوەری عێراق ئەمەی راگەیاندووە و باسی لەوەش کردووە کە ئاسایشی دهۆک هاوکاریان بوون.

مادەکان لە شاری دهۆک دەستیان بەسەرداگیراوە و بریتین لە 236 کیلۆ و 476 گرام حەبی کەپتاگۆن و 35 کیلۆ و 755 گرام ئەفیون.

لەوبارەیەوە، سەرچاوەیەک لە ئاسایشی دهۆک هەواڵەکەی پشتڕاستکردەوە و گووتی، بە هاوبەشی لەگەڵ هێزێکی ئاسایشی نەهێشتنی مادە هۆشبەرەکان کە لە بەغداوە هاتبوون ئۆپراسیۆنەکەیان کردووە.

وتیشی، دۆسیەکە لەلایەن دادگای کەرخی یەکەم لە بەغداوە سەرپەرشتی دەکرێت.