گرژییەکانی سودان رۆژ لەدوای رۆژ درێژەدەکێشێت

هەولێر – نۆرس پرێس

100رۆژە هێزەکانى عەبدولفەتاح ئەلبورهان و حمێدتیی، کوچە و کۆڵانەکانى خەرتووم و دارفۆریان ئاگرباران کردووە و 10 هەزار کەسیان کردووە بە قوربانی ململانێکانى خۆیان، کە نزیکەى چوار هەزاریان هاوڵاتیین.

لە ناوەڕاستى مانگی نیسانی ئەمساڵەوە، شەڕى ناوخۆى سودان لەنێوان هێزەکانی پشتیوانی خێرا و سوپای سودان بەردەوامە، تائێستا کۆى هەوڵەکان بۆ وەستاندنی شەڕەکە بێئەنجامبووە، دۆخەکەش بەجۆرێکە کەس نازانێت کێ براوە و کێ دۆڕاوە.

بەهۆی شەڕەوە 10 هەزار کەس بوونەتە قوربانی و زیانی زیاتر لە 50 ملیار دۆلار بەر ژێرخانی ئابووری وڵاتەکە کەوتووە.

بەگوێرەی ئامارەکانى نەتەوەیەکگرتوەکان، لەم 100 رۆژەدا، سێ ملیۆن کەس لە باشوری خەرتوم و دارفۆر ماڵەکانیان بەجێهێشتووە و لە نێو خێمەدا دەژین، جگە لەو سەدان هەزار کەسەى، ئاوارەى وڵاتان بوون.

70%ى نەخۆشخانەکانی خەرتوم و دارفۆر شوێنى فیشەکیان پێوەیە، بەشێکیان کراون بە سەربازگە و بەشەکەى دیکەشیان، تەنانەت دەرزییەکیشى تێدانییە، ئەمەش دۆخى ئەو هاوڵاتییانەى لە خەرتووم ماونەتەوە خراپتر کردووە.

بەشێک لەو هاوڵاتییانەى بەهۆى شەڕەکەوە ئاوارەبوون، دەڵێن، عەبدولفەتاح ئەلبورهان و حمێدتیی، سودانیان خستووەتە دۆخێکەوە، جاران خەڵک بەدواى ناندا رایدەکرد، ئێستا لەترسى گوللـەى وێڵ خۆى دەشارێتەوە، دیاریش نییە کەى شەڕى نێوان ئەو دووانە کۆتایی پێدێت.