لە قامیشلۆ زیان بە تاوەرەکانی کارەبا گەیشتووە
قامیشلۆ- نۆرس پرێس
فەرمانگەی وزەی کارەبا لە جزیرێ ڕایگەیاند، ڕۆژی دووشەممە بەهۆی گەردەلوولەکەی شەوی ڕابردووە زیان بە تاوەرەکانی کارەبا گەیشتووە و بووە هۆی پچڕانی کارەبا لە هەرێمی جزیرێ.
فەرمانگاکە لە پەیجی تایبەتی خۆیان لە تۆڕی کۆمەڵایەتی فەیسبووک بڵاویکردووەتەوە، بەهوی ئەو باو و بارانانەی کە ناوچەکەی گرتووەتەوە زیان بە دوو تاوەری کارەبا گەیشتووە و تاوەرێکی تریش ڕووخاوە.
ئاماژەی بەوەشدا، وەرشەی چاککردنەوە دەستیکردووە بە چاککردنەوەی هێلەکانی کارەبا بۆ ئەوەی دووبارە بخرێنەوە کار و کارەبا بە چەند شارێکی ناوچەکە بدات.
لە ناوەڕاستی شەوی ڕابردوودا، چەند ناوچەیەکی سوریا ڕووبەڕووی زریانێکی سەخت بوونەتەوە و بووەتە هۆی گیانلەدەستدان و برینداربوونی دەیان کەس لە ئیدلب، هەروەها زیاتر لە 30 خێمە لە حەلەب و ئیدلب و رەقە زیانیان پێگەیشتووە.