سیاسەتمەدارانی سوەیدا: بزاوتەکەمان ئاشتیانەیە و بەردەوام دەبێت تا رووخاندنی رژێم
خۆپیشاندەرانی سوەیدا داوای رۆشتنی بەشار ئەسەد دەکەن – نۆرس پرێس
سوەیدا – نۆرس پرێس
سیاسەتمەدارانی سوەیدا لە باشووری سوریا، جەختیان لەوە کردەوە کە بزاوت و خۆپیشاندنای ئاشتیانە بەردەوام دەبێت تا ئامانجەکانی “رووخاندنی رژێم، گۆڕینی سیستەمی حوکمڕانی گەندەڵ” و جێبەجێکردنی بڕیارنامەی 2254 ی نەتەوە یەکگرتووەکان، بەدی دێت.
ئەو ناڕەزایەتیانەی لە سوەیدا لە حەڤدەی مانگی ئابی رابردووەوە دەستیان پێکردووە بەردەوامە و دروشمەکانی رۆیشتنی “ئەسەد” و جێبەجێکردنی بڕیارنامەی 2254 و جەختیان لەسەر بەردەوامبوونی ناڕەزایەتییەکان کردووە تا گەیشتن بە چارەسەری سیاسی.
جەمال ئەلشەوفی، نووسەر و شرۆڤەکاری سیاسی لە سوەیدا، بە نۆرس پرێسی راگەیاند، “هاوکێشەی سوریا تەنها هاوکێشەیەکی نێودەوڵەتی نییە، بەڵکو هاوکێشەیەکی ناوخۆییە و لە دوو جومگەدا تێکەڵاون”.
ئەلشەوفی گوتیشی: هەنگاوی یەکەم ساڵی 2013 بوو،کە هەنگاوێکی ھەرێمی بوو، دوای بڕیارنامەی نێودەوڵەتی لە جنێڤ و دەستپێشخەری عەرەبی بۆ گواستنەوەی سیاسی دەستبەجێ بوو لەگەڵ حکومەتێکی خاوەن دەسەڵاتی تەواودا، تا چوونە ناو شەڕێکی درێژخایەنەوە کە لە ساڵی 2015 بەردەوام بوو، هەردوو لایەنی ململانێکان و دەسەڵات و گروپەکان بە تەواویی خۆیان بە هیلاک برد لەو جەنگەدا”.
بەردەوام بوو و گوتی “پاشان رووسیا لە ساڵی 2015 تا 2018 دەستێوەردانی کرد و پاش بڕیارنامەی 2254 سوریا بە تەواوی بەهیلاک برا”.
ئەو نووسەرە سیاسییە پێیوایە “لە ساڵی 2018 ەوە تا ئەمڕۆ، رووسیا نەیتوانیوە کارنامەی خۆی دەربارەی دۆسیەی سوریا بسەپێنێت”.
ئاماژەی بەوەشکرد: “لەلایەکی دیکەوە، هێزەکانی ئۆپۆزسیۆن ناتوانن لە پێگەیەکی بەهێزەوە دانوستان بکەن، بەو پێیەی پێگەی خاک و دەرکەوتنی ئاشتیانە لەدەست دەدەن و بڕیارنامە نێودەوڵەتییەکان ملکەچی لیژنەیەکی دەستورین”.
ئێستا بە گوتەی ئەلشەوفی، سوەیدا بە بزووتنەوەی مەدەنی ئاشتیخوازانەی خۆی کە (نە تەبشیرییە و نە تەکفیری) و هەموو مەزهەبەکان قبوڵ دەکات، “مەسەلەی سوریا لە دەروازەی مەدەنی خۆیەوە زیندوو دەکاتەوە و هێزێکی زیادە بۆ چارەسەرکردنی پرسی سوریا دابین دەکات لە ئاستی نێودەوڵەتیدا”.
ئەو نووسەرە سیاسییە دەشڵێت: “سوەیدا نوێنەرایەتی دوو خاڵ دەکات، یەکەمیان: جوڵاندنی پرسی سوریا لە ناوخۆدا، بۆ گەڕاندنەوەی ئارامی و مەدەنیەت و رۆحی رەسەنایەتی، ئێمە رۆڵەی دەسەڵات نین، بەڵکو رۆڵەی دەوڵەتی ماف و یاساین، کە تێیدا هەموو لایەنەکان لەسەر پێکهێنانی گرێبەستێکی کۆمەڵایەتی رێکبکەون”.
“خاڵی دووەم ئەوەیە کە سوەیدا بە بڕگەیەکی گرنگە لە دۆسیەی سوریا لەسەر ئاستی نێودەوڵەتی و بە گەڕاندنەوەی شایستەییەکان بە جێبەجێکردنی بڕیارنامەی 2254 دادەنرێت، سەرەتا گواستنەوەی سیاسی دەستپێدەکات و پرسە ئابووری و دەستوورییەکان دواتر دێن”، بەپێی نووسەر و شرۆڤەکاری سیاسی جەمال ئەلشەوفی.
لە بەرامبەردا موهەنەد شیهابەدین، چالاکوانی سیاسی لە سوەیدا، جەخت لەوە دەکاتەوە کە داخوازییەکانی شەقامی سوەیدا بریتین لەوەی کە: “خەڵک دەیەوێت رژێم بڕووخێنێ”، بەڵام بەشێوەیەکی ئاشتیانە، “چونکە ئەوان بڕوایان بە جێبەجێکردنی بڕیارنامەی نێودەوڵەتیە، […] کە پێویستییەکی حەتمییە و ناتوانرێت بەدەر بکرێت یان وازی لێبهێنرێت”.
چەند رۆژ لەمەوبەر”تیمی راپەڕینی جەماوەریی” لە پارێزگای سوەیدا، دوای هەڵوەشاندنەوەی مانگرتنی هەمەلایەنە لە سەرەتای ئەم هەفتەیەدا، فەرمانێکیان دەرکرد و بزووتنەوەکەیان لە داخستنی فەرمانگەکانی حکومەت و خزمەتگوزاری بێبەری کرد.
“تیمی ڕاپەڕینی جەماوەری” رێکخەری بزووتنەوە و ناڕەزایەتییەکانی سوەیدایە، کە راوێژکاری لە نێوان ئەوان و خۆپیشاندەراندا ئەنجام دەدرێت، لەسەر بنەمای ئەو بزووتنەوەیە راگەێنراو بە ناوی بزووتنەوەکە بڵاودەکرێتەوە.
شیهابەدین بە نۆرس پرێسی گوت: “ئێمە بە جددی هەوڵدەدەین جیهان بە هەموو بەرپرسیارێتیەکانیەوە بوەستێت بۆ جێبەجێکردنی بڕیارنامەی 2254 و ئاماژەی بەوەشکرد، ئەوەی ئێستا لە گۆڕەپانی ئەلکەرەمە دەگوزەرێت ” نە ناڕەزایی ئابوورییە و نە ماددییە، نە داواکارییە بۆ دۆخی کۆمەڵایەتی یان ئابووری، بەڵکو داواکارییەکی سیاسی دروستە (خەڵک دەیەوێت دەسەڵات بڕوخێنێت و سیستەمی گەندەڵی و ستەمکاری بگۆڕێت )”.